HomeBotë

Erdogan: Nuk i japim rëndësi gjuhës kërcënuese të SHBA-së

Nga gjuha kërcënuese e Shteteve të Bashkuara nuk do të përfitojë askush, tha të mërkurën presidenti i Turqisë, Recep Tayyip Erdogan.

Dy vendet, aleate të NATO-s, janë në mosmarrëveshje për rastin e një pastori amerikan, të burgosur në Turqi nën akuzat për terrorizëm.

Pastori i krishterë, Andrew Brunson, i cili ka jetuar në Turqi për më shumë se dy dekada, akuzohet se ka ndihmuar një grup të udhëhequr nga kleriku mysliman, Fethullah Gulen, të cilin Ankaraja e akuzon për përpjekjen për grushtshtet në Turqi, në vitin 2016.

Ai është arrestuar qysh në tetor të atij viti.

Presidenti i SHBA-së, Donald Trump, dhe zëvendësi i tij, Mike Pence, e kanë kërcënuar Turqinë me sanksione të fuqishme nëse pastori nuk lirohet.

Duke folur për gazetarët në Ankara, Erdogan tha se Turqia nuk do të bëjë kompromise sa i përket pavarësisë së gjyqësorit.

“Nuk do t’i japim rëndësi gjuhës kërcënuese”, tha Erdogan/evropaelire.org


TË NGJASHME