HomePolitikë

5 Maji/ Gramoz Ruçi: Partizanët e rënë gjatë Luftës janë…

Kryetari i Kuvendit, Gramoz Ruçi, bëri paraditen e sotme  homazhe në Varrezat e Dëshmorëve në qytetin e Fierit, për të përkujtuar 5 Majin dhe nderuar dëshmorët e atdheut.

I shoqëruar nga pjesëtare dhe të afërm të familjeve të dëshmorëve, veteranë të Luftës Antifashiste Nacional-Çlirimtare dhe pasardhës të tyre,  deputetë dhe drejtues të pushtetit vendor të qarkut Fier si edhe qytetarë të shumtë, Kryetari i Kuvendit vendosi një kurorë me mbishkrimi “Lavdi të përjetshme dëshmorëve të atdheut”.

“Dëshmorët janë çmimi i Lirisë së atdheut tonë të dashur, Shqipërisë,  e cila i ka rrënjët në sakrificat e të rënëve gjatë gjithë historisë së saj. Prandaj qëndrimi ndaj dëshmorëve të atdheut, nuk është një çështje  morali apo edukimi, por një çështje themelore e identitetit tonë kombëtar. Dëshmorët nuk u takojnë partive, por Shqipërisë. Partitë tregojnë emancimin e tyre, kur nderojnë dëshmorët.

Gramoz-Ruci

Çdo kohë dhe çdo përpjekje për liri kombëtare e shoqërore ka nxjerrë dëshmorët  e saj. Dhe shqiptarët i kanë nderuar dhe do të vazhdojnë t’i nderojnë të rënët dhe me këtë nderim tregojnë emancipimin  e tyre kombëtar, shoqëror, politik dhe kulturor.

Partizanët dëshmorë, të rënë gjatë Luftës Antifashiste  Nacional-Çlirimtare, janë një legjion nderi i kombit shqiptar, me të cilët shqiptarët janë krenuar, krenohen dhe do të krenohen përjetësisht. Ata dhanë jetën në një nga momentet më vendimtare të historisë së Shqipërisë, kur përcaktohej fati i atdheut të tyre, nëse do të bashkohej me frontin e përbotshëm antifashist e progresist dhe do të vendosej në krahun e duhur të historisë dhe të ardhmes së vendit të tyre, Europës dhe qytetërimit botëror. Partizanët shqiptarë bënë zgjedhjen e duhur dhe dëshmorët partizanë dhanë jetën e tyre në atë kohë përcaktuese e  vendimtare.

Partizanët dhe dëshmorët antifashistë të Shqipërisë iu bashkuan misionit të miliona luftëtarëve dhe dëshmorëve antifashistë të Europës dhe Shteteve të Bashkuara të Amerikës, për të mbrojtur e çliruar atdheun e tyre, kontinentin dhe botën nga murtaja fashiste. Prandaj sot shqiptarët, ashtu si të gjithë europianët e vërtetë, nderojnë sakrificën sublime për lirinë.”, thuhet në mesazhin e Gramoz Ruçit.


TË NGJASHME