HomePolitikë

Anëtarësimi në BE, Xhaçka-Varhelyi: Brenda vitit të miratohet korniza negociuese

Ministrja për Evropën dhe Punët e Jashtme, Olta Xhaçka zhvilloi këtë të premte një takim virtual me Komisionerin për Fqinjësinë dhe Zgjerimin, Oliver Varhelyi.

Ministrja Xhaçka vlerësoi rolin e Komisionerit Varhelyi në dosjen e zgjerimit, si dhe në atë të ndihmës nga Komisioni Evropian për përballimin e pasojave të tërmetit dhe të pasojave të pandemisë në Shqipëri gjatë 2020-ës.

Ministrja Xhaçka vlerësoi edhe propozimin e Komisionit për Planin Ekonomik e të Investimeve për rajonin e Ballkanit Perëndimor, të propozuar në tetor 2020.

Ministrja Xhaçka theksoi se Shqipëria i ka përmbushur detyrat e saj përpara Konferencës së parë Ndërqeveritare duke informuar Komisionerin për përmbushjen e funksionalitetit të Gjykatës Kushtetuese dhe zbatimin e reformës elektorale në bazë të rekomandimeve të OSBE/ODIHR.

Ministrja Xhaçka vlerësoi si historik vendimin pozitiv të Këshillit të marsit 2020 për hapjen e negociatave të anëtarësimit me Shqipërinë dhe kërkoi që gjatë vitit 2021, të bëhet i mundur miratimi i kornizës negociuese për Shqipërinë dhe mbajtja e Konferencës së parë Ndërqeveritare sa më parë.

Më herët gjatë ditës, ministrja Xhaçka u takua me ambasadorin e Delegacionit të Bashkimit Evropian në Shqipëri, Luigi Soreca, të cilin e falënderoi për mbështetjen e Delagacionit dhe të tijën personale për tërmetin, pandeminë dhe procesin e integrimit të Shqipërisë.


TË NGJASHME