HomeLajmi i Fundit

Antiinformaliteti/ Operacioni i madh natën në Tiranë, në pranga edhe 7 biznesmenë

Është zhvilluar mbrëmë një operacion i gjerë antiinformalitet nga oficerët e Antikrimit Ekonomik në zbatim të urdhërarresteve të lëshuara nga Prokuroria e Tiranës. 

Deri në orët e vona të mbrëmjes janë arrestuar 13 persona, mes të cilëve 7 biznesmenë, që dyshohet të kenë shmangur detyrimet tatimore, duke mos bërë deklarimet e parashikuara me ligj.

Burimet thanë se operacioni ka nisur që prej orëve të vona të së martës, ka vazhduar dje gjatë gjithë ditës, ndërsa ka vijuar me kontrolle banesash dhe priten edhe arrestime të tjera. Në aksion janë përfshirë edhe strukturat e Drejtorisë së Tatimeve, që kishin denoncuar disa prej rasteve të fshehjes së faturave tatimore. Fshehje që dyshohet të kenë shkaktuar një dëm prej miliona eurosh.

Hetimet kishin nisur disa javë më parë nga Antikrimi Ekonomik në bashkëpunim me Prokurorinë e Tiranës. Pasi janë siguruar provat e nevojshme, organi i akuzës ka firmosur urdhrat e ndalimit për të paktën 20 persona. Përgjatë dy ditëve, Policia ka bërë të mundur ekzekutimin e 13 urdhrave duke vënë në pranga personat e dyshuar, mes të cilëve edhe 7 biznesmenë.

Ndërsa operacioni ka vazhduar edhe gjatë natës për arrestimin e personave të tjerë, për të cilët Prokuroria ka vendosur që të ndalohen. Policia nuk ka dhënë ende një njoftim zyrtar për operacionin dhe nuk dihen emrat e personave të arrestuar. Kjo, për arsye se aksioni është në zhvillim e sipër dhe mund të dëmtojë hetimet apo të sjellë largimin e personave të tjerë të dyshuar për këtë veprimtari të jashtëligjshme.

ANTIINFORMALITETI

Aksionet antiinformalitet nisën gjatë muajve të verës, fillimisht me lirimin e plazheve publike, të zaptuara në mënyrë të paligjshme nga biznesmenë të ndryshëm, por edhe në zona të tjera turistike të vendit. Më tej, vëmendja u përqendrua te pikat e tregtimit të karburanteve, me kontrolle, bllokime, madje edhe ndalime për shkelje të ndryshme që u konstatuan.

Dje u lajmërua se aksioni i radhës do të ishte në fushën e ndërtimit. Megjithatë, operacioni që u zhvillua mbrëmë nga Policia e Tiranës duket se ka të bëjë me fshehjen e faturave tatimore, një tjetër fushë ku u paralajmërua se do të shtrihej operacioni kundër informalitetit.

U paralajmërua se këtë herë në qendër të vëmendjes do të ishin bizneset e mëdha, megjithatë, në kushtet kur ende nuk ka një informacion zyrtar nga Policia apo edhe nga Prokuroria, nuk dihet se çfarë përfaqësojnë me saktësi personat e arrestuar.

Nëse biznesmenët e ndaluar gjatë këtij operacioni administrojnë biznese të mëdha apo të vogla, apo janë tregtarë subjektesh të ndryshme. Megjithatë, burimet konfirmuan se bëhet fjalë për disa biznesmenë të njohur në Tiranë, ndonëse emrat e tyre nuk bëhen të ditur.