HomeSociale

Gjuetia e paligjshme, të shtëna armësh të përditshme në Parkun e Zagorisë

Gjuetia e paligjshme po shfaros një pjesë të faunësParkun NatyrorZagorisë. Banorët e zonës raportojnë për të shtëna të përditshme në të gjithë krahinën.

Me një sipërfaqe prej 24.600 hektarë, të ndarë në dy zona me prioritet të diferencuar, statusi i Parkut Natyror iu dha Zagorisë 6 muaj më parë, për të garantuar mbrojtjen e pasurisë së florës dhe faunës së zonës dhe orientimin e krahinës drejt ekoturizmit.

Agjencia e Zonave të Mbrojtura e konfirmon praninë e gjuetarëve të pagjishëm, ndërsa inkurajon banorët të denoncojnë, sidomos gjuetinë gjatë natës. Specia më e goditur për periudhën mbetet derri i egër, por banorët flasin edhe për gjuetinë e kaprollit, thëllëzës dhe lepurit.

Drejtuesi i agjencisë, Gligor Dushi thotë se zona po patrullohet përveçse nga rojtarët, edhe prej Policisë së Rendit, por moratoriumin nuk po respektohet.

Prania e madhe e armëve të gjuetisë me leje në të gjithë territorin e qarkut është duke e sfiduar moratoriumin e gjuetisë. AZM mundet vetëm të padisë gjuetarë, që kapen në kushtet e flagrancës me gjah të vrarë, ndërsa qarkullimi me armë gjahu në këtë territor nuk është akt i kundërligjshëm.

Tashmë shpresohet që përmes kamerave “kurth” që po instalohen në shumë pika të parkut, të gjurmohen përveç faunës së egër, edhe gjuetarët e paligjshëm.

Shoqata “Zagoria” iu është drejtuar autoriteteve disa herë gjatë javëve të fundit, që të marrin masa për të shpëtuar faunën e rrallë të zonës nga një sulm periodik. Banorët flasin edhe për kërcënime që po vijnë nga grupet dominuese të gjahtarëve për të heshtur mbi situatën.


TË NGJASHME