HomeLajmi i Fundit

Kamioni me 39 të vdekur në Britaninë e Madhe, arrestohen dy të dyshuar

Autoritetet britanike thanë se kanë arrestuar edhe dy persona në lidhje me vdekjen e 39 njerëzve – trupat e të cilëve janë gjetur në një frigorifer kamion këtë javë, në juglindje të Anglisë.

Një burrë dhe një grua, të dy nga 38 vjeç dhe nga qyteti Uarington i Anglisë, u arrestuan nën dyshimet për vrasje dhe komplot për të trafikuar njerëz, tha policia në Essex.

Shoferi i kamionit, Mo Robinson, 25 vjeç nga Irlanda e Veriut, mbetet në paraburgim nën dyshimet për vrasje. 39 trupat e pajetë janë gjetur më 23 tetor, rreth 32 kilometra larg Londrës.

Policia ka thënë më 24 tetor se viktimat, 31 burra dhe tetë gra, besohet se janë shtetas kinezë. Megjithatë, Ambasada e Kinës në Londër ka thënë se policia është ende duke verifikuar identitetin e viktimave dhe se kombësia e tyre nuk është konfirmuar. Frigoriferi kamion besohet se ka hyrë në Britani nga Belgjika.