HomeSociale

Kosova forcon masat kundër koronavirusit

Qeveria e Kosovës ka njoftuar se në këto ditë të vështira që po kalon vendi prej koronavirusit është vendosur të mbyllen të gjitha parqet.

Deri më tani në Kosovë raportohen 24 të prekur me këtë virus.

Grupi ndërinstitucional për menaxhimin e incidenteve nëpërmjet një komunikate ka marrë vendim që të gjitha parqet nëpër të gjitha komunat e Republikës së Kosovës do të mbyllen nga ora 08:00 deri në ora 20:00.

Më tej thuhet se Policia e Kosovës do të jetë në të gjitha pikat ku janë parqet dhe nuk do të lejojë asnjë qytetarë që t’i frekuentojnë.

“Kërkojmë mirëkuptim nga të gjithë qytetarët e Republikës së Kosovës që të respektojnë vendimet e organeve të Institucioneve të Republikës së Kosovës, sepse ato po bëhen me qëllim të ruajtjes së shëndetit tuaj dhe të familjes tuaj. Po ashtu ftojmë të gjithë qytetarët e Republikës që gjatë daljeve publike, të mbajnë distancën sociale me njëri-tjetrin. Po ashtu obligohen që nga nesër të gjitha marketet dhe dyqanet që janë të lejuara të punojnë, që të vendosin shenjat për mbajtjen e distancës prej një metër. Gjithashtu nga nesër në të gjitha lokalet do të ndalohet shërbimi i kafes si brenda ashtu edhe për t’i marrë me vete (Take Away), pavarësisht llojit të shërbimit primarë”, thuhet në komunikatë.

Gjithashtu u bëhet apel qytetarëve që të ndjekin këto udhëzime sepse janë për të mirë e tyre.

“Ju ftojmë që të kontribuoni duke Qëndruar në Shtëpi, për të mos i humbur mundin, mjekut, policit, ushtarëve të FSK-së, doganiereve, ekipeve emergjente dhe të gjithë atyre që po japin kontribut për të tejkaluar këtë situatë. Të gjitha këto vendime hyjnë në fuqi nga nesër prej orës 08:00”, -thuhet në komunikatë

K.S/GotaNews


TË NGJASHME