HomePolitikë

Meta flet pas takimit me ministrin austriak

Presidenti i Republikës, Ilir Meta priti sot në një takim Ministrin Federal për Evropën, Integrimin dhe Punët e Jashtme të Republikës së Austrisë, Alexander Schallenberg.

Presidenti Meta e falënderoi Ministrin Schallenber për mbështetjen që Austria vijon t‘i japë pa rezerva procesit të integrimit europian të Shqipërisë, duke vënë në dukje se “Austria ishte një prej vendeve që nënshkroi letrën mbështetëse për çeljen e negociatave me Shqipërinë dhe Maqedoninë e Veriut”.

Presidenti vlerësoi bashkëpunim efektiv dypalësh midis agjencive të zbatimit të ligjit të dy vendeve tona, dhe inkurajoi forcimin e mëtejshëm të tyre.

Presidenti Meta shprehu kënaqësinë për trendin pozitiv në shkëmbimet ekonomike e tregtare dypalëshe, si dhe çmoi asistencën austriake në edukimin profesional, duke kërkuar që eksperienca e shkëlqyer e Shkollës së Mesme Profesionale “Peter Mahringer” në Shkodër, të shtrihet edhe më gjerë në vend.

Gjithashtu, Presidenti Meta e falenderoi Ministrin Schallenber për angazhimin e menjëhershëm, solidaritetin e treguar dhe ndihmat humanitare të autoriteteve austriake për tejkalimin e pasojave të tërmetit të 21 shtatorit.

Pas takimit, Meta ka ndare me miqte e tij te FB kete shenim: 

E falënderova për mbështetjen që Austria vijon t‘i japë pa rezerva procesit të integrimit europian të Shqipërisë, veçanërisht si një prej vendeve që nënshkroi letrën mbështetëse për çeljen e negociatave me vendin tonë dhe Maqedoninë e Veriut.
I domosdoshëm një bashkëpunim më i ngushtë dhe i gjithanshëm mes dy vendeve tona për të forcuar më tej marrëdhëniet historike miqësore.


TË NGJASHME