HomeSociale

Ministria e Shëndetësisë: Deri në këto momente asnjë rast me koronavirus në Shqipëri

Në komunikimin e përditshëm me median, zëvendësministrja e Shëndetësisë, Mira Rakacolli tha se Ministria e Shëndetësisë dhe Mbrojtjes Sociale tha se deri në këto momente Shqipëria nuk ka asnjë rast të konfirmuar me COVID-19. Ajo shtoi se qeveria ka vendosur në dispozicion të spitaleve një fond shtesë për mjetet e mbrojtjes personale.

“Pas mbledhjes së djeshme të Komitetit të Ekspertëve, Ministria e Shëndetësisë ka vendosur rialokimin e një fondi shtesë prej 1 milion dollarë vetëm për shtimin e stokut të mjeteve të mbrojtjes personale në strukturat shëndetësore. Ministria e Shëndetësisë siguron se aktualisht, të gjitha strukturat spitalore kanë gjendje sasinë e nevojshme të mjeteve të mbrojtjes personale për këtë fazë në të cilën ndodhemi”, tha Rakacolli.

Më tej ajo njofton se Ministria e Shëndetësisë dhe Mbrojtjes Sociale këshillon qytetarët që vijnë nga rajonet e prekura, të vetëkarantinohen për një periudhë prej 14 ditësh.

“Nga survejanca e përforcuar në pikat kufitare rezulton se janë kontrolluar dhe këshilluar 4800 udhëtarë që kanë një histori udhëtimi me vendet e prekura nga shpërthimi komunitar i koronavirusit, gjatë 24 orëve të fundit.

Ministria e Shëndetësisë dhe Mbrojtjes Sociale rekomandon qytetarët që vijnë nga rajonet e prekura, të vetëkarantinohen për një periudhë prej 14 ditësh.

Ministria e Shëndetësisë rekomandon qytetarët që kanë udhëtuar në vendet e prekura dhe kanë shenjat e infeksionit viral, temperaturë, kollë dhe sidomos insuficencë respiratore (vështirësi në frymëmarrje) të telefojnë 127 për të marrë udhëzimet e duhura se si të veprojnë”, u shpreh zv.ministrja.

Përmes një postimi në “Facebook” Ministria e Shëndetësisë ka publikuar një video ku njofton qytetarët se si duhet të veprojnë kur kanë udhëtuar në vendet e prekura nga koronavirusi dhe kthehen në Shqipëri.

K.S/ GotaNews


TË NGJASHME