HomePolitikë

Salianji tregon kur mund të zgjidhet kriza politike

Ish-deputeti i Partisë Demokratike, Ervin Salianji thotë se opozita do t’i pamundësojë zgjedhjet e 30 qershorit nëse bëhen pa të.

Sipas tij, zgjidhja e krizës politike do të bëhet brenda kësaj date.

“Unë besoj se do të ketë zgjidhje para datës 30 qershor dhe nuk besoj që i bllokojmë ne zgjedhjet, por i bllokon Rama. Përderisa tentohen votime pa zgjidhje dhe diktime si në Korenë e Veriut apo si në Shqipërinë e para 90-ës, këto janë bllokime, sepse nuk i lihet mundësia shqiptarëve të bëjnë zgjedhjen. Nëse do të tentohet ne do të bëjmë pamundësinë e kësaj farse, e kësaj çmenduria që Shqipëria e vitit 2019 nuk do ta lejojë. Ne të organizuar nuk do lejojmë që kjo farsë të ndodhë dhe që Rama të shkojë me votim pa zgjedhje në 30 qershor”, tha Salianji për Ora.

Në lidhje me tryezën që Presidenti Meta do të zhvillojë me partitë e vogla, në koalicion me PD, Salianji tha se është në koordinim me pikat që opozita ka për zgjidhjen e krizës.

“Është një takim i kërkuar nga aleatët e PD. Nuk është kundër iniciativave që PD ka propozuar apo kërkon për zgjidhjen e krizës. Është në koordinim në të gjitha pikat që koalicioni opozitar ka parashtruar. Pa diskutim që zgjidhja themelore e uljes në një tryezë dialogu është largimi i Ramës dhe hapja e rrugës për një qeveri tranzitore”, u shpreh ai.


TË NGJASHME