HomeShëndeti

Shpallet epidemi fruthi në Maqedoninë e Veriut

Ministria e Shëndetësisë në Maqedoninë e Veriut shpalli epideminë e fruthit në të gjithë territorin e vendit. Shkak për një vendim të tillë u bë rritja e numrit të personave të prekur nga kjo sëmundje, si dhe frika e përhapjes me pasoja edhe më të mëdha.

Sipas autoriteteve, nga fillimi i vitit janë regjistruar 4 viktima nga fruthi, ndërsa 961 persona janë infektuar, 60% e të cilëve janë jashtë Shkupit.

Më së shumti, sëmundja ngjitëse rezulton të ketë prekur fëmijët. Mbi 70 të mitur janë shtruar në spital prej saj, 7 nga të cilët janë në gjendje të rëndë për shkak të disa komplikacione.

Drejtori i Institutit të Shëndetit Publik, Vladimir Mikiç, sqaroi se shpallja e epidemisë kishte për qëllim zbatimin e masave plotësuese lidhur me parandalimin e përhapjes së sëmundjes ngjitëse, uljen e infektimeve të reja, si dhe frenimin e formave të rënda të sëmundjeve si pasojë e fruthit.

Një prej masave të marra ishte ndalimi i vizitave në çerdhe, ndërsa një tjetër lidhet me uljen e moshës së vaksinimit nga 12 në 6 muaj. Instituti i Shëndetit Publik ka ndaluar edhe vizitat nëpër spitale, ndërsa kontrolle do të ketë edhe për punonjëset e kopshteve.


TË NGJASHME