HomePolitikë

Sot para Komisionit, Presidenti jep mesazhin e parë

Presidenti i Republikës, Ilir Meta, ka mbërritur në këmbë në Kryesinë e Kuvendit, ku do të dalë para Komisionit Hetimor Parlamentar.

Ai është shoqëruar drejt Kuvendit nga dy këshilltarët e tij, ai për Sigurinë, Bahri Shaqiri, dhe ai për Mediat, Tedi Blushi. I pyetur nga gazetarët nëse i druhet përballjes me komisionin dhe shkarkimit, Kreu i Shtetit ka deklaruar se nuk ka frikë.

“Presidenca në mbrojtje të Kushtetutës. Nuk kam frikë, do jem President deri më  2021”, ka thënë Meta.

Meta do të pyetet në komision nga deputetët e mazhorancës për dekretin e tij për rrëzimin e 30 qershorit si datë të zgjedhjeve lokale dhe dekretimin e 13 tetorit për zhvillimin e këtyre zgjedhjeve.

Meta ishte i përpiktë me orarin e vendosur nga Kuvendi, duke shkuar aty para orës 10:00. Ka qenë Ulsi Manja, kryetari i këtij komisioni ai që hapi mbledhjen, ndërsa në unanimitet u ra dakord dhe rendi i ditës. Manja sqaroi edhe planin që do të ndjekë ky komision, ndërsa i shpjegoi atij procedurat që do të ndiqen.

“Ndarja e pushteteve nuk është dispozitë që mund të lexohet lirisht. Por është filozofi drejtimi, e ushtrim kompetencash. Kushtetua nuk përcakton detaje për ushtrimin e kompetencave, por janë krerët e shteteve ata që vetëpërmbahen në ushtrimin e tyre. Ky sistem i adoptuar nga Kushtetuta, përpara kërkesës së luajitetit, shpreh interes të ndërsjellët ndaj secilit institucion. Këto ishin disa konsiderata të miat për çështjen në shqyrtim. Duke shpresuar në bashkëpunimin e anëtarëve sot, ju ftojmë që ti krijojmë mundësinë presidentit që të shprehet në lidhje me hetimin”, pohoi Manja.

Meta do të shoqërohet nga Këshilltari për Sigurinë, Bahri Shaqiri, Këshilltari Ligjor, Bledi Dervishaj si dhe këshilltari për Mediat, Tedi Blushi.

Plani hetimor që do të ndjekë maxhoranca, i miratuar nga komisioni, në thelb synon hetimin e shkeljeve të mundshme të Kreut të Shteti në lidhje me zhdekretimin e zgjedhjeve të 30 qershorit, datë kjo që shkaktoi reagime të forta dhe përplasje mes subjekteve politike. Hapi i parë procedural që do të ndiqet është seanca dëgjimore me Presidentin e Republikës, në zbatim të nenit 112, pika 3 të Rregullores së Kuvendit.

foto galeri

TË NGJASHME